Türkiyənin İzmir şəhərində yerləşən Ege Universitetində Azərbaycan Dövlət Aqrar Universiteti (ADAU) ilə birgə həyata keçirilən ikili diplom proqramı üzrə təhsil alan tələbələrin məzun günü keçirilib.
Gencexeber.az-ın məlumatına əsasən, tədbirdə hər iki universitetin rəhbər şəxsləri, professor-müəllim heyəti, tələbələr və onların ailə üzvləri iştirak ediblər.
ADAU-nun rektoru Zəfər Qurbanov çıxış edərək məzunları təbrik edib, onlara gələcək fəaliyyətlərində uğurlar arzulayıb.
Qeyd olunub ki, Kənd təsərrüfatı fakültəsi üzrə həyata keçirilən ikili diplom proqramı çərçivəsində 64 tələbə məzun olub, onlardan 12 nəfəri magistratura təhsili almaq hüququ qazanıb.
Azərbaycan Respublikasının Elm və Təhsil Nazirinin müşaviri Nicat Məmmədli çıxışında Azərbaycan və Türkiyə arasında təhsil sahəsindəki əməkdaşlığın uğurlu nəticələrindən bəhs edib.
O, ikili diplom proqramının tələbələr üçün yaratdığı imkanları xüsusi vurğulayaraq, bu cür layihələrin beynəlxalq təhsil mühitində rəqabətqabiliyyətli mütəxəssislərin formalaşmasına mühüm töhfə verdiyini bildirib.
Tədbirin sonunda məzunlara diplomlar təqdim olunub, mərasim musiqili proqram və xatirə şəkillərinin çəkilməsi ilə davam etdirilib.
