Xəbər verdiyimiz kimi, Gəncədən qalxan Türkiyənin hərbi yük təyyarəsi Gürcüstan-Azərbaycan sərhədində, Gürcüstan ərazisində qəzaya uğrayıb.
Gencexeber.az məlumat verir ki, sosial şəbəkələrdə Türkiyə Milli Müdafiə Nazirliyinə məxsus, noyabrın 11-i qəzaya uğrayan C130 tipli hərbi yük təyyarəsinin Gəncə Hava Limanından qalxarkən saz vəziyyətdə çəkildiyi son görüntüsü yayılıb.
Gəncə səmasında çəkildiyi ehtimal edilən fotoda görünən bu təyyarə Amerika Birləşmiş Ştatlarının, Şimali Atlantika Müqaviləsi Təşkilatı (NATO) ölkələrinin və bir sıra digər dövlətlərin əsas hərbi nəqliyyat vasitəsidir. Sözügedən hava gəmisi 2014-cü ilə qədər dünyada ən geniş istifadə olunan hərbi nəqliyyat təyyarəsi sayılıb.
Bununla belə, dünən sosial şəbəkələrdə paylaşılaraq Gəncə Hava Limanından qalxarkən saz vəziyyətdə çəkildiyi ehtimal edilən görüntülərdəki təyyarənin Türkiyəyə məxsus digər hərbi nəqliyyat təyyarəsi — "Airbus A400M Atlas" olub.
Məlumat üçün bildirək ki, Türkiyə Milli Müdafiə Nazirliyi Gürcüstanda baş verən təyyarə qəzası ilə əlaqədar 20 hərbçinin həlak olduğunu rəsmi olaraq açıqlayıb. Nazirlik Türkiyə şəhidlərinin hamısının adlarını ictimaiyyətin diqqətinə çatdırıb.
