Göygöldə həm sərnişinlərin, həm də piyadaların intensiv istifadə etdiyi küçənin vəziyyəti sakinlərin narazılığına səbəb olub.
Gencexeber.az məlumat verir ki, Gəncədən Göygöl Rayon Mərkəzi Xəstəxanasına aparan, şəhərin Heydər Əliyev prospekti ilə Aydın Hacıyev küçəsini birləşdirən yolun vəziyyəti sakinlərin narazılığına səbəb olub.
Sakinlərin sözlərinə görə, sözügedən küçənin giriş hissəsində şəhidlərin xatirəsinə inşa olunan bulaq, çıxışında isə Şəhidlər xiyabanı yerləşir. Yol həm Göygöl, həm də Gəncə istiqamətində intensiv istifadə olunur.
Bildirilib ki, "BakuBus"a məxsus şəhərlərarası "G1" və "G2" marşrut avtobusları, eləcə də 1 və 2 nömrəli mikroavtobuslar məhz bu küçə ilə hərəkət edir.
Lakin sakinlər qeyd edirlər ki, küçədə piyada və sərnişinlərin təhlükəsiz hərəkəti üçün lazımi şərait yaradılmayıb. Ərazidə səkilər və avtobus dayanacaqları aydın şəkildə təşkil olunmayıb, piyada keçidləri isə mövcud deyil. Bundan başqa, avtomobil yolunun asfalt örtüyü də bir neçə hissədə dağılıb.
Sakinlər aidiyyəti qurumlardan yol boyunca piyada infrastrukturu, dayanacaqlar və yol örtüyü ilə bağlı zəruri tədbirlərin görülməsini xahiş edirlər.
