Xəbər verdiyimiz kimi, Gəncədə Heydər Əliyev Park-Kompleksi ərazisində yerləşən süni göl yenidən istifadəyə verilib.
Gencexeber.az məlumat verir ki, parkın müdiri İlyas Məmmədov redaksiyamıza müsahibəsində gölün artıq tam şəkildə su ilə doldurulduğunu bildirib. Onun sözlərinə görə, istirahət guşəsinin əməkdaşları tərəfindən genişmiqyaslı iməcilik təşkil olunub, ərazidə təmizlik işləri aparılıb və bunun ardından əlavə abadlıq, eləcə də dezinfeksiya tədbirlərinin həyata keçirilməsi nəzərdə tutulub.
İlyas Məmmədov qeyd edib ki, süni gölə müxtəlif balıq növləri, həmçinin quşlar buraxılacaq ki, bu da ərazinin daha cəlbedici və canlı istirahət məkanına çevrilməsinə xidmət edəcək.
Park müdiri sakin və ziyarətçilərə müraciət edərək ərazinin təmiz saxlanılmasını xahiş edib. O, vətəndaşları göl və ətrafını zibilləməməyə, yaradılan şəraitin qorunmasına həssas yanaşmağa çağırıb.
Qeyd edək ki, 6 hektar əraziyə malik süni göl 2023-cü ilin yaz aylarında qonşu rayonlardan gələn sel suları nəticəsində daşaraq ətraf yaşayış sahələri üçün təhlükə yaratmışdı. Dibi lil və palçıqla dolan gölün suyu həmin vaxt aidiyyəti qurumlar tərəfindən tamamilə çəkilmişdi.
