"İcbari tibbi sığortanın tətbiqi ilə bağlı regionlarda bəzi problemlərlə qarşılaşırıq. Nə TƏBİB-dən, nə icbari tibbi sığortadan, nə də aidiyyəti qurumdan müsbət cavablar ala bilirik".
Bunu deputat Naqif Həmzəyev Milli Məclisin İnsan hüquqları komitəsinin bu gün keçirilən iclasında bildirib.
"Gəncə şəhərində bəzi cərrahiyyə əməliyyatlarının dövlət xəstəxanalarında həyata keçirilməsi mümkün deyil. Deyirlər ki, Gəncədəki dövlət xəstəxanaları bunu edə bilmir. Dövlət xəstəxanalarından imtina cavabı aldıqdan sonra vətəndaş Gəncədə yerləşən və icbari tibbi sığorta çərçivəsində əməliyyat həyata keçirə bilən özəl xəstəxanalara müraciət edə bilmir.
Məncə, aidiyyəti qurumlar bu problemin həlli ilə bağlı da çıxış yolu tapmalıdırlar. Hamını Bakıdakı xəstəxanalara toplamaqla böyük növbə yaratmağa ehtiyac yoxdur. Bakıdakı tibbi xidmətləri və imkanları digər böyük şəhər və rayonlara da köçürmək və ya regionlardakı ixtisaslı özəl xəstəxanalara dəstək olmaq lazımdır. Əks təqdirdə, regionlarda özəl xəstəxanalarda çalışan həkimlərin də Bakıya axın edəcəklərini görəcəyik", - deputat əlavə edib.
Mənbə: qafqazinfo.аz
