Gəncə şəhərinin Füzuli küçəsində, “Kəpəz” stadionunun yaxınlığında, “Maxi Market” və Musiqi Kollecinin arxa tərəfində yerləşən ərazidə yüksək gərginlikli elektrik xətləri açıq vəziyyətdədir. Yerli sakinlər bu vəziyyətin böyük təhlükə yaratdığını bildirirlər.
Gencexeber.az-ın məlumatına görə, ərazidə sıx məskunlaşma var və ətrafda uşaqlar hər gün oynayır. Sakinlər qeyd edirlər ki, məsələ ilə bağlı dəfələrlə aidiyyəti qurumlara müraciət etsələr də, indiyədək heç bir tədbir görülməyib.
“Naqillərdə gərginlik o qədər yüksəkdir ki, əgər açıq hissəyə 1 metr məsafədən yaxınlaşsan, adamı külə çevirər,” – deyə şikayətçi bildirir.
Sakinlər aidiyyəti qurumlardan dərhal tədbir görülməsini, elektrik xətlərinin izolyasiya edilməsini və təhlükəsizlik baxımından ərazinin mühafizə altına alınmasını tələb edirlər. Hazırkı vəziyyət xüsusilə uşaqlar üçün həyati təhlükə yaradır.
