Gəncə şəhərinin ən işlək yollarından biri olan Şah İsmayıl Xətai prospektində yenicə salınmış asfalt örtüyü yenidən qazılıb.
Vəziyyətdən şikayətçi olan sürücülər Gencexeber.az-a bildiriblər ki, qazıntı işləri yolun hərəkətinə ciddi şəkildə təsir edib və artıq ərazidə qəza da baş verib.
Qeyd edək ki, adıçəkilən prospekt Gəncənin əsas nəqliyyat arteriyalarından biridir.
Bu yol üzərində Abbas Səhhət adına xəstəxana yerləşir, həmçinin Qazax, Şəmkir və digər qərb rayonlarına çıxış bu prospekt vasitəsilə təmin olunur.
Sakinlər və sürücülər yeni asfaltın tez bir zamanda qazılmasını məsuliyyətsizlik kimi dəyərləndirir və aidiyyəti qurumlardan bu cür halların təkrarlanmaması üçün nəzarətin gücləndirilməsini və yolun təmirini tələb edirlər.
