Gəncənin Cavad Rəfibəyli küçəsində bir müddət əvvəl asfalt çəkilsə də, qısa müddət sonra yol çöküb.
Gencexeber.az-a daxil olan şikayətlərə görə, ərazidə yaranmış problemin aradan qaldırılması məqsədilə Qazax Yol İstismarı İdarəsi tərəfindən təmir-bərpa işlərinə başlanılıb. Lakin sakinlər bildirirlər ki, işlər tam sürətlə aparılmır və yolun istifadəyə yararlı vəziyyətə gətirilməsi 10 gündən çox gecikir.
Hazırda küçənin sözügedən hissəsində yaranmış vəziyyət həm sürücülərin, həm də piyadaların hərəkətini çətinləşdirir. Vətəndaşlar bildirirlər ki, yolun uzun müddət bu vəziyyətdə qalması əlavə narahatlıqlara səbəb olur.
Sakinlər aidiyyəti qurumdan problemin mümkün qədər tez aradan qaldırılmasını və küçədə bərpa işlərinin sürətləndirilməsini istəyirlər.
