Gəncə şəhərinin bir sıra ərazilərində yolların baxımsız vəziyyətdə olması sürücülərin və sakinlərin gündəlik hərəkətində çətinliklərə səbəb olur.
Gencexeber.az məlumat verir ki, Məmmədtağı Cəfərov küçəsində yol örtüyünün yararsız vəziyyətə düşməsi nəqliyyatın gediş-gəlişinə maneələr yaradır. Sakinlərin sözlərinə görə, mövcud durum xüsusilə avtomobil idarə edənlər üçün ciddi narahatlıq doğurur.
Bənzər vəziyyət Sadıllı qəsəbəsinin 8-ci küçəsində də müşahidə olunur. "BakuBus" MMC-yə məxsus 12 nömrəli marşrut avtobuslarının istifadə etdiyi yolun bir hissəsi qazıldıqdan sonra əvvəlki vəziyyətinə gətirilməyib. Nəticədə həmin sahədən keçən avtobusların və digər nəqliyyat vasitələrinin hərəkəti çətinləşib.
Sakinlər aidiyyəti qurumlara müraciət edərək hər iki ünvanda vəziyyətin araşdırılmasını, yol örtüyünün bərpasını və problemin qısa müddətdə həllini xahiş edirlər.
