Gəncə Regional Vəkil Bürosunun yeni inzibati binasının açılış mərasimi keçirilib.
Gencexeber.az məlumat verir ki, tədbir Azərbaycan Respublikası Vəkillər Kollegiyasının (ARVK) təşkilatçılığı ilə baş tutub. Mərasimdə Gəncə şəhər icra hakimiyyətinin başçısı Niyazi Bayramov, Prezident Administrasiyasının Hüquq mühafizə orqanları ilə iş şöbəsinin sektor müdiri Otari Qvaladze, ARVK-nın sədri Anar Bağırov, Kollegiyanın Rəyasət Heyətinin üzvləri, vəkillər və media nümayəndələri iştirak ediblər.
Çıxış edənlər yeni inzibati binanın istifadəyə verilməsinin Gəncədə vəkillik fəaliyyətinin səviyyəsinin yüksəldilməsinə və hüquqi xidmətlərin keyfiyyətinin artırılmasına mühüm töhfə verəcəyini bildiriblər.
Qeyd olunub ki, bina Vəkillər Kollegiyasının vəsaiti hesabına tam təmir olunub, müasir avadanlıqla təchiz edilib. Yeni mərkəzdə 21 iş otağı və konfrans zalı fəaliyyət göstərir. Burada vəkillərin rahat və effektiv şəkildə fəaliyyət göstərməsi üçün hər cür şərait yaradılıb.
Hazırda Gəncə şəhərində 70-ə yaxın vəkil və 3 vəkil bürosu fəaliyyət göstərir. Yeni binanın açılışı regionda hüquqi xidmətlərin inkişafına dəstək məqsədi daşıyır.
