Gəncədə fəaliyyət göstərən xarici tikinti şirkətlərindən birinin rəhbəri vəfat edib.
Gencexeber.az-ın məlumatına görə, Türkiyə vətəndaşı Mustafa Karabelanın Gəncə şəhərinin Gülüstan yaşayış massivində yaşadığı evdə cansız bədəni aşkar edilib. İlkin ehtimallara görə, 40 yaşlı kişinin ölümünə ürək tutması səbəb olub.
Əldə etdiyimiz məlumata görə, mərhum Gəncədə işləri ilə əlaqədar müvəqqəti olaraq tək yaşayıb. O, Gəncə şəhərində avtomobil yollarının asfaltlanması işlərini həyata keçirən "DKT İnşaat Sanayi ve Ticaret Anonim Şirketi"nin Azərbaycandakı filialının qurucusu və rəhbəri olub.
Mustafa Mehmet oğlu Karabela əslən Türkiyənin Trabzon şəhərindəndir. Mərhum ailəli və 3 övlad sahibidir.
Mərhumun nəşi sabah Türkiyənin Trabzon şəhərinə aparılacaq. O, Taştepe ailə qəbiristanlığında torpağa tapşırılacaq.
Məlumata görə, nəşin Türkiyəyə aparılması üçün şirkətin sahiblərindən biri, eyni zamanda mərhumun qardaşı Cemal Karabela Gəncəyə təcili olaraq gələrək lazımı prosedurları həyata keçirir.
