Gəncədə qadının qeyri-rəsmi münasibətdə olduğu kişini bıçaqlaması ilə bağlı məhkəmə qərarı açıqlanıb.
1995-ci il təvəllüdlü Əfsanə (adlar şərtidir) qeyri-rəsmi münasibətdə yaşadığı Zöhrabla ailə-məişət zəminində mübahisə edib. İstintaq materiallarına əsasən, münaqişə zamanı Zöhrab qadını döyüb.
Bundan sonra Əfsanə mətbəxdən götürdüyü bıçaqla Zöhrabın döş qəfəsinə bir dəfə zərbə vurub.
Məhkəmədə ifadə verən Əfsanə özünü təqsirli bilsə də, hadisənin qəsdən baş vermədiyini bildirib.
Zərərçəkmiş Zöhrab da məhkəmədə verdiyi ifadəsində hadisənin ehtiyatsızlıq nəticəsində baş verdiyini deyib.
Gəncə Ağır Cinayətlər Məhkəməsinin hökmü ilə Əfsanə 2 il 11 ay 28 gün müddətinə azadlıqdan məhrum edilib. Onun cəzasını ümumi rejimli cəzaçəkmə müəssisəsində çəkməsi müəyyən edilib.
Məhkəmə eyni zamanda Cinayət Məcəlləsinin 79.1-ci maddəsini tətbiq edərək, təqsirləndirilən şəxsin 2019-cu il təvəllüdlü övladı 14 yaşına çatanadək cəzanın icrasını təxirə salıb.
Mənbə: demokrat.аz
