Gəncə Şəhər İcra Hakimiyyətinin, Gəncə-Daşkəsən Regional Mədəniyyət İdarəsinin dəstəyi, Özbəkistan Respublikasının Azərbaycan Respublikasındakı Fəxri Konsulluğunun təşəbbüsü və təşkilatçılığı ilə Gəncə Dövlət Milli Dram Teatrında Əmir Pəhləvanın “Sevənlərindir dünya” tamaşası nümayiş olunub.
Gencexeber.az bildirir ki, tamaşada Gəncə Şəhər İcra Hakimiyyətinin başçısı Niyazi Bayramov, Özbəkistan Respublikasının Azərbaycan Respublikasındakı fövqəladə və səlahiyyətli səfiri Bahrom Aşrafxanov, Türkiyənin Gəncədəki baş konsulu Recep Öztop, Gürcüstanın Gəncədəki baş konsulu Kaxaber Abdaladze, Özbəkistan Respublikasının Azərbaycan Respublikasındakı fəxri konsulu Kənan Cəlilov, millət vəkilləri, məhkəmə sədrləri, hüquq-mühafizə orqanlarının rəhbərləri qonaq qismində iştirak ediblər.
Azərbaycan Dövlət Akademik Musiqili Teatrının yaradıcı kollektivinin peşəkar təqdimatında səhnə əsəri nümayiş olunub. “Sevənlərindir dünya” adlı tamaşada iki qardaş xalq – Azərbaycan və Özbəkistan xalqları arasındakı tarixi, mədəni və mənəvi bağlardan bəhs edilir. Əsərdə azərbaycanlı oğlan Şərif və özbək qızı Müyəssərin sevgi taleyindən söhbət açılır.
Səhnə əsəri tamaşaçılar tərəfindən böyük rəğbət və alqışlarla qarşılanıb.
