Gəncə Şəhər İcra Hakimiyyətinin dəstəyi, Yeni Azərbaycan Partiyası Gəncə şəhər təşkilatının təşəbbüsü ilə şəhid övladları üçün növbəti “Yay məktəbi” təşkil olunub.
Gencexeber.az bildirir ki, dörd gün davam edəcək “Yay məktəbi”nin ilk günü şəhid övladları Şəhidlər Xiyabanına gələrək “Əbədi məşəl” abidəsini ziyarət ediblər.
“Yay məktəbi” proqramı çərçivəsində iştirakçılar Heydər Əliyev Mərkəzini ziyarət edəcək, Ulu Öndərin abidəsi önünə gül dəstələri qoyacaq, dahi şəxsiyyətin həyat və fəaliyyətinə dair foto və şəxsi əşyalarla tanış olacaqlar. Proqramın üçüncü günündə uşaqlar Gəncə şəhərində yerləşən “İmamzadə” dini kompleksini ziyarət edəcəklər.
Sonuncu gün isə şəhid övladları Göygöl Dövlət Təbiət Qoruğuna və Göygöl rayonu ərazisində yerləşən “Xan yurdu” yaylaq düşərgəsinə ekskursiya edəcəklər.
Xatırladaq ki, “Yay məktəbi”nin əsas məqsədi şəhid övladlarının dünyagörüşünü, bilik və bacarıqlarını artırmaq, onların asudə vaxtlarını səmərəli keçirmələrinə şərait yaratmaqdır.
