Gəncədə şəhid övladları üçün növbəti dəfə "Yay məktəbi" layihəsi həyata keçirilir.
Gencexeber.az məlumat verir ki, adıçəkilən tədbirə Gəncə Şəhər İcra Hakimiyyətinin dəstəyi, YAP Gəncə şəhər təşkilatının təşkilatçılığı ilə start verilib.
Layihənin ilk günü çərçivəsində şəhid atası Miryunis Seyidzadə və şəhid övladları Gəncə Şəhər İcra Hakimiyyətinin başçısı Niyazi Bayramov, YAP Gəncə şəhər təşkilatının sədri Bayram Aslanov, Nizami Bələdiyyəsinin sədri Qoşqar Məmmədov, Gəncə Şəhər İcra Hakimiyyəti başçısı Aparatının məsul əməkdaşları və partiya fəalları ilə birlikdə Şəhidlər xiyabanını ziyarət ediblər. Burada şəhidlərin xatirəsini ehtiramla yad edərək, "Əbədi məşəl" abidəsinin önünə gül dəstələri düzüblər.
Daha sonra uşaqlar onlar üçün xüsusi təşkil olunmuş avtobusla Gəncə Memorial Kompleksinə yollanıblar. Orada şəhid övladlarına 2020-ci ilin oktyabr ayında Ermənistan silahlı qüvvələri tərəfindən törədilən ağır faciələr barədə ətraflı məlumat verilib.
Uşaqlar Kompleksin tərkibində fəaliyyət göstərən muzeyi də ziyarət edərək "XX əsrin əvvəli", "Deportasiya və məcburi köçkünlük", "Soyqırımı və kütləvi qırğınlar", "Atəşkəs və Vətən müharibəsi dövrü", "İtkin düşənlər, kütləvi məzarlıqlar, mina terroru" və "İşıqlı gələcəyə doğru" mövzularına həsr olunmuş ekspozisiya zalları ilə tanış olublar.
Qeyd edək ki, beş gün davam edəcək "Yay məktəbi" proqramı çərçivəsində şəhid övladları üçün "Loqos" Psixoloji və Nitq İnkişaf Mərkəzinin regional filialının əməkdaşları tərəfindən müxtəlif mövzularda təlimlər keçiriləcək. Həmçinin şəhid övladları "Gəncə MALL" ticarət və istirahət mərkəzində, "Gəncland" ailəvi istirahət və əyləncə kompleksində olacaq, onlar üçün təşkil edilən müxtəlif əyləncə proqramlarında iştirak edəcəklər.
