Gəncədə sahibsiz itlərin sayının artması əhalinin ciddi narahatlığına səbəb olur.
Gencexeber.az-a şikayət edən sakinlərin sözlərinə görə, şəhərin müxtəlif ərazilərində – parklarda, küçələrdə və yaşayış binalarının qarşısında dolaşan heyvanlar ciddi təhlükəyə çevrilib.
Rəsmi məlumatlara əsasən, Gəncədə hər ay sahibsiz itlər tərəfindən 100-dən çox vətəndaşın dişlənməsi halı qeydə alınır. Bu rəqəm problemin miqyasını və sakinlərin narahatlığının səbəbsiz olmadığını göstərir.
Sakinlər bildirirlər ki, xüsusilə axşam və gecə saatlarında küçələrdə it sürülərinə rast gəlmək mümkündür. Bu vəziyyət uşaqların, yaşlıların və digər piyadaların təhlükəsizliyi ilə bağlı narahatlıq yaradır.
Xatırladaq ki, məsələnin həlli üçün 2023-cü ildə yaradılan "Yuva" heyvan sığınacağında itlərin peyvənd olunması və saxlanılması nəzərdə tutulurdu. Lakin ötən ilin yanvar ayında maddi çatışmazlıqlar səbəbindən sığınacaq fəaliyyətini dayandırıb.
Vətəndaşlar sahibsiz itlərlə bağlı problemin həlli üçün aidiyyəti qurumların daha ciddi və effektiv tədbirlər görməsini istəyirlər.
