Gəncədə sahibsiz itlərin küçələrdən toplanması prosesi zamanı heyvansevərlərlə aidiyyəti qurumların əməkdaşları və şəhər sakinləri arasında demək olar ki, hər gün mübahisələr yaşanır.
Gencexeber.az-ın məlumatına görə, martın 12-dən etibarən şəhərdə Mənzil-Kommunal Təsərrüfatı İstehsalat Birliyinin (MKTİB) nümayəndələrinin iştirakı ilə IDEA Heyvanlara Qayğı Mərkəzi tərəfindən sahibsiz heyvanların toplanmasına başlanılıb. Şəhərdə sahibsiz itlərin sayının nəzarətsiz artması, eləcə də son dövrlərdə it dişləməsi hallarının kəskin çoxalması ilə əlaqədar aparılan işlərə xüsusi avtomobillər və işçi qüvvəsi cəlb olunub.
Lakin şəhərin müxtəlif ərazilərində dördayaqlıların toplanması zamanı heyvansevərlərlə bu addımı dəstəkləyən sakinlər arasında gərginlik yaranır. Mübahisələr əsasən yüksək ton və emosional çıxışlarla müşayiət olunur.
Heyvansevərlər itlərin toplanmasına qarşı çıxaraq onların yenidən küçələrə qaytarılmasını tələb edirlər. MKTİB nümayəndələri bildirirlər ki, sahibsiz itlər Bakıya aparılacaq, qısırlaşdırıldıqdan sonra yenidən Gəncəyə qaytarılacaq. Ancaq bu izahat heyvansevərlər tərəfindən inamsızlıq və narazılıqla qarşılanır.
Digər tərəfdən, bəzi şəhər sakinləri də mübahisələrə qoşularaq yaşadıqları ərazilərdə nəzarətin gücləndirilməsini, habelə sahibsiz itlərin ümumiyyətlə küçələrdən yığışdırılmasını tələb edirlər. Bu isə onsuz da gərgin olan vəziyyəti daha da alovlandırır. Mübahisələrin bəzən yoldan keçən uşaqların gözü qarşısında baş verməsi isə mənzərəni daha da narahatedici edir.
Qeyd edək ki, problemin həlli məqsədilə 2023-cü ildə Gəncədə yaradılmış "Yuva" heyvan sığınacağında sahibsiz itlərin peyvənd olunması və saxlanılması nəzərdə tutulurdu. Lakin ötən ilin yanvar ayında maddi çatışmazlıqlar səbəbindən sığınacağın fəaliyyəti dayandırılıb.
Rəsmi məlumatlara görə, Gəncədə son iki ay ərzində 380 nəfər sahibsiz itlərin hücumuna məruz qalaraq dişlənib.
