Gəncə sakini Məmməd Babayevin evi 2020-ci ildə Ermənistan silahlı qüvvələri tərəfindən şəhərə endirilən raket zərbəsi nəticəsində ciddi zərər görən tikililərdən biridir.
Gencexeber.az-a şikayətçi M.Babayev bildirib ki, həmin vaxt onun ailəsi Rusiya Federasiyasında yaşayıb. Hadisə zamanı evdə yalnız onun anası, mülkiyyətin sahibi Zərifə Babayeva olub.
Hadisədən sonra Babayevlər ailəsinə dəymiş ziyanın qiymətləndirilməsi üçün xüsusi komissiya yaradılıb. Azərbaycana qayıdan Məmməd Babayevə bildirilib ki, evin vəziyyəti ilə bağlı rəy veriləcək. Lakin sonradan təqdim olunan sənəd ailəni qane etməyib.
Məmməd Babayevin sözlərinə görə, ev üçün "təmir-bərkitmə" qərarı çıxarılıb, lakin binanın bünövrəsi belə təhlükə altındadır. Bu günədək isə tikilidə yalnız kosmetik işlər aparılıb. Lakin şikayətçi bu işlərin keyfiyyətindən narazılıq edir:
"Evin divarlarında dərin çatlar yaranıb, hər an uçmaq təhlükəsi var. Beş ildir ki, ailəmlə birlikdə kirayədə yaşayıram," – şikayətçi bildirib.
Raketin düşdüyü yer ilə Babayevlərə məxsus evin arası təxminən 40–50 metrdir. Məmməd Babayev deyir ki, son beş ildə müraciət etmədiyi qapı qalmayıb. Xüsusilə son iki ildə Şəhərsalma və Arxitektura Komitəsinə göndərdiyi məktublara heç bir cavab verilməyib. Əvvəlki illərdə isə müxtəlif qurumlar məsuliyyəti bir-birinin üzərinə atıblar.
Qeyd edək ki, ziyanın qiymətləndirilməsi məqsədilə yaradılan komissiyanın tərkibinə bir neçə dövlət qurumu, o cümlədən Gəncə Şəhər İcra Hakimiyyəti də daxil edilib.
Təmir-tikinti işlərinə isə Dövlət Şəhərsalma və Arxitektura Komitəsi nəzarət edib. Qurumdan bildirilib ki, Məmməd Babayevin şikayəti ilə bağlı əlavə araşdırma aparılacaq.
