Gəncədə yüzlərlə ailə çətin vəziyyətdə qalıb.
Gencexeber.az-a son iki gündə daxil olan çoxsaylı şikayətlərə görə, smart tipli qaz sayğaclarında balansın artırılması ilə bağlı ciddi çətinliklər yaranıb. Vətəndaşlar ödəniş terminalları vasitəsilə karta vəsait yükləyərkən problemlə üzləşdiklərini bildirirlər: vəsait köçmür, terminallar kart məlumatlarını tanımır, yaxud ödənilən məbləğ balansda əksini tapmır. Nəticədə Gəncədə yüzlərlə ailə qışın soyuğunda qaz təchizatından məhrum qalıb.
Məsələ ilə bağlı Gəncə Regional Qaz İstismar İdarəsinin Gəncə Xidmət Sahəsinin rəis müavini Samin Hacıyev redaksiyamıza açıqlamasında bildirib ki, hazırda ödəniş sistemi işləmir. Onun sözlərinə görə, nasazlığa səbəb ötən ilin son günlərində limitin qalıq hissəsini almaq məqsədilə ölkə üzrə kütləvi şəkildə qaz kartlarının balansının artırılması olub. Qeyd edilib ki, sistemin yaxın bir saat ərzində bərpası gözlənilir və bu istiqamətdə işlər aparılır.
Eyni zamanda, Mpay QSC-dən Gencexeber.az-a bildirilib ki, hazırda "Azəriqaz" İB xidmətində, xüsusilə "Zenner" ödənişləri üzrə texniki nasazlıq müşahidə olunur. Problem ümumi "Azəriqaz" sistemindən qaynaqlanır və aradan qaldırılması istiqamətində işlər görülür. Nasazlıq aradan qaldırıldıqdan sonra vətəndaşlar terminallar vasitəsilə ödənişlərini bərpa edə biləcəklər.
