Gəncədə dekorativ gül dibçəkləri naməlum şəxslər tərəfindən oğurlanıb.
Gencexeber.az-a görüntüləri təqdim edən sahibkar iddia edib ki, hadisə Heydər Əliyev prospektində yerləşən “Gence Lazer Studio”nun qarşısında baş verib. Salona məxsus 7-yə yaxın gül dibçəyi gecə saatlarında aparılıb. Hətta salondan bir qədər aralıda yerləşən gül kolları da vəhşicəsinə çıxarılıb.
Müşahidə kameralarına düşən görüntülərdə bu əməli üç nəfərin – iki yetkin qadın və bir yeniyetmə qızın törətdiyi açıq-aşkar görünür. Kadrlar göstərir ki, onlar əvvəlcədən hazırlıq görərək əllərində polietilen paketlərlə gələrək gülləri bir-bir torpaqdan çıxarıb aparıblar.
“Mən bu gülləri sadəcə məkan gözəlliyi üçün düzürdüm. İnsanların baxanda ruhu dincəlsin deyə. Amma onları yerindən çıxarıb aparıblar. Heyrətə gəldim,” – deyə salon sahibi bildirib.
