Xəbər verdiyimiz kimi, Gəncədə "Nizaminin evi" kimi tanınan tikili uzun illər baxımsız vəziyyətdə qalmışdı.
Gencexeber.az-ın əldə etdiyi məlumata görə, 1982-ci ildə "Nizami" bədii filminin çəkilişləri üçün inşa edilən tarixi məkanın bərpasına başlanılıb. Azərbaycan Respublikası Mədəniyyət Nazirliyinin sifarişi əsasında həyata keçirilən təmir-bərpa işlərinin məqsədi tikilinin tarixi görkəmini qorumaq, zamanla yaranmış aşınma və zədələri aradan qaldırmaqdır.
Hazırda ərazidə çalışan təmir-tikinti briqadası tərəfindən qırmızı kərpicdən inşa olunmuş binanın dağılmış hissələri üzərində, fasad və dam örtüyündə təmir işləri aparılır. Eyni zamanda qapılar, pəncərələr və onların çərçivələri bərpa edilir.
Layihə çərçivəsində yalnız əsas tikili deyil, filmin çəkildiyi ərazidə yerləşən digər elementlərin də bərpası nəzərdə tutulur. Ətraf ərazinin abadlaşdırılması, tarixi görünüşün qorunması və məkanın estetik vəziyyətinin yaxşılaşdırılması istiqamətində zəruri tədbirlər görülür.
Məlumata görə, bütün işlər tarixi autentikliyin saxlanılması prinsipi əsasında həyata keçirilir. Bununla da Gəncənin simvolik məkanlarından biri olan "Nizaminin evi"nin əvvəlki görkəminə qaytarılması hədəflənir.
