Gəncə şəhərində mobil telefon abunəçilərinin sayı son illərin ən aşağı həddinə düşüb.
Gencexeber.az-ın Dövlət Statistika Komitəsindən əldə etdiyi məlumatına əsasən, 2025-ci ildə Gəncədə 342 min 200 mobil telefon abunəçisi qeydə alınıb. 2024-cü ildə bu göstərici 424 min 500 təşkil edib. Beləliklə, bir il ərzində abunəçilərin sayı 82,3 min və ya 19,4 faiz azalıb.
Statistikaya görə, Gəncədə mobil telefon abunəçilərinin sayı 2021-ci ildə 377 min 600, 2022-ci ildə 380 min 200, 2023-cü ildə isə 469 min 200 olub. 2023-cü ildə qeydə alınmış maksimum göstəricidən sonra azalma müşahidə edilir. 2025-ci ilin nəticəsini 2023-cü illə müqayisə etdikdə abunəçilərin sayı 127 min və ya 27,1 faiz azalıb.
Ümumilikdə Gəncə-Daşkəsən iqtisadi rayonunda da azalma qeydə alınıb. İqtisadi rayon üzrə mobil telefon abunəçilərinin sayı 2024-cü ildə 659 min 600 olduğu halda, 2025-ci ildə 576 minə enib. Bu isə bir il ərzində 83,6 min abunəçi və ya təxminən 12,7 faiz azalma deməkdir.
2025-ci ildə Gəncə-Daşkəsən iqtisadi rayonunda qeydə alınan 576 min mobil telefon abunəçisinin 59,4 faizi Gəncə şəhərinin payına düşüb.
Müqayisə üçün qeyd edək ki, Azərbaycan üzrə mobil telefon abunəçilərinin ümumi sayı 2024-cü ildə 11 milyon 323 min, 2025-ci ildə isə 10 milyon 989,7 min təşkil edib. Ölkə üzrə də göstəricidə təxminən 2,9 faiz azalma qeydə alınıb.
