Gəncə şəhərinin Sevinc qəsəbəsində hər gün ciddi sıxlıq yaranır.
Gencexeber.az-a daxil olan çoxsaylı şikayətlərdə bildirilir ki, ərazi küçə alverçiləri tərəfindən zəbt edildiyi üçün nəqliyyatın hərəkətində çətinliklər yaşanır.
Xüsusilə Gəncə şəhər 21 nömrəli tam orta ümumtəhsil məktəbinə aparan yolun əsas küçə ilə kəsişdiyi hissədə vəziyyət daha da gərgindir. İddialara görə, yolun kənarlarının zəbt olunması səbəbindən avtobusların dayanacaqlara daxil olması ciddi problemə çevrilib. Digər nəqliyyat vasitələrinin hərəkəti də çətinləşib.
Sakinlər bildirirlər ki, məktəb ətrafında yaranmış bu vəziyyət həm sürücülər, həm də şagirdlər və valideynlər üçün ciddi narahatlıq yaradır.
Onlar aidiyyəti qurumlardan məsələyə müdaxilə etməyi, ərazidə nəzarətin gücləndirilməsini və yolun həm piyadalar, həm də nəqliyyat üçün istifadəyə yararlı vəziyyətə gətirilməsini xahiş edirlər.
