Gəncə şəhər M.A.Abbaszadə adına 20 nömrəli tam orta məktəb qarşısındakı işıqfor uzun müddətdir işləmədiyi üçün şagirdlərin və yerli sakinlərin həyatı təhlükəyə atılıb.
Gencexeber.az-a daxil olan şikayətə əsasən, məktəbin qarşısındakı yol həm məktəblilər, həm də ərazidə yaşayanlar tərəfindən intensiv istifadə olunur. İşıqforun işləməməsi səbəbilə avtomobillər bu ərazidə dayanmadan hərəkət edir və piyadalara, xüsusilə də azyaşlı uşaqlara yol vermirlər.
Sakinlərin sözlərinə görə, məsələ ilə bağlı aidiyyəti qurumlara dəfələrlə müraciət edilsə də, nəzarətə götürülməyib, əraziyə heç bir texniki baxış keçirilməyib.
Məktəblilər hər gün dərsə gedərkən və ya evə dönərkən bu təhlükəli yolu keçməyə məcbur qalırlar. Sakinlər məsul şəxslərdən problemin təcili şəkildə həllini və işıqforun bərpasını tələb edirlər.
