Gəncədə sökülən yataqxananın damından sallanan dəmir parçası piyadalar üçün təhlükə yaradır.
Gencexeber.az məlumat verir ki, Gəncənin Fərhad Əliyev küçəsində söküntüsü aparılan yataqxana binasının damında təhlükəli vəziyyət yaranıb. Bir neçə gündür sökülməkdə olan tikilinin dam konstruksiyasına məxsus iri dəmir parçası sallanmış vəziyyətdə qalıb.
Sakinlər bildirirlər ki, keçmiş yataqxananın qarşısında avtobus dayanacağı yerləşir və ərazidən gün ərzində çoxlu sayda piyadalar keçir. Küləkli hava şəraitində sallanan dəmir parçası insanların həyatı üçün ciddi təhlükə yaradır.
Vətəndaşların sözlərinə görə, söküntü işləri bir neçə gün aparıldıqdan sonra dayandırılıb. Təhlükə yaradan dəmir parçasının isə ən azı iyulun 28-dən etibarən həmin vəziyyətdə qaldığı müşahidə olunub.
Sakinlər aidiyyəti qurumlardan təhlükə yaradan konstruksiyanın qısa zamanda sökülərək ərazinin təhlükəsiz vəziyyətə gətirilməsini xahiş edirlər.
