Gəncədə yaşadıqları küçəni zibilxanaya çevirən sakinlərə ciddi xəbərdarlıq edilib.
Gencexeber.az məlumat verir ki, söhbət şəhərin mərkəzi hissəsində yerləşən Əkbər Babayev küçəsində uzun müddətdir davam edən sanitar problemdən gedir. Redaksiyamız tərəfindən bəzi sakinlərin məişət tullantılarını yol kənarına və çinar ağacının ətrafına mütəmadi olaraq atmaları, eləcə də bu vəziyyətdən narazı olan digər vətəndaşların şikayətləri ictimailəşdirilib.
Sözügedən hal Mənzil Kommunal Təsərrüfatı İstehsalat Birliyi (MKTİB) tərəfindən də təsdiqlənib. Qurumdan Gencexeber.az-a bildirilib ki, ərazidə tullantıların yol kənarına atılması halı dəfələrlə təkrarlanıb.
Qeyd olunub ki, ərazidən cəmi 100–150 metr məsafədə, Gəncə Tibb Kollecinin yaxınlığında kifayət qədər zibil konteyneri mövcuddur. Buna baxmayaraq, bəzi sakinlər tullantıları konteynerlərə deyil, küçəyə atmağa davam ediblər.
MKTİB-in əməkdaşları və texnikasının köməyi ilə ərazi təmizlənib. Toplanan tullantılar yığılaraq aidiyyəti üzrə daşınıb. Qurum isə sakinlərə bir daha xəbərdarlıq edib:
"Şəhərin sanitar vəziyyətinin qorunub saxlanılması məqsədilə məişət və digər tullantılarınızı hara gəldi deyil, bunun üçün nəzərdə tutulmuş konteynerlərə atın. Əks halda sanitar qaydaları pozan sakinlər inzibati qaydada məsuliyyətə cəlb olunacaqlar".
