Gəncə Gömrük İdarəsinə gətirilən onlarla TIR maşınında bir aya yaxındır ki, xarab olmuş kartoflar boşaldılmadan qalır. Nəticədə ərazidə kəskin qoxu yayılıb və bu vəziyyət yaxınlıqdakı sakinləri ciddi narahat edir.
Gencexeber.az-a daxil olan çoxsaylı şikayətlərə əsasən, Gəncə Gömrük İdarəsinin qarşısında həftələrdir park edilən ağırtonnajlı yük maşınlarında olan kartof məhsulu iylənərək çürüyür. Məlumata görə, məhsullar günlərlə maşınların yük bölməsində qalıb və çəkinin təsirindən əzilərək su buraxmağa başlayıb. Bu səbəbdən ərazidə pis qoxu yayan gölməçələr yaranıb.
Yaxınlıqda yaşayan vətəndaşlar bildirir ki, yayılan kəskin qoxu təkcə küçələri deyil, evlərin içərisini də bürüyüb: “Artıq evdə nəfəs almaq mümkün deyil. Hətta bəzi günlərdə nəcis qoxusundan da betər bir iy hiss olunur”.
Vətəndaşlar aidiyyəti qurumlardan məsələ ilə bağlı tədbir görülməsini və ərazidən xarab olmuş məhsulların təcili olaraq təmizlənməsini tələb edirlər. Onların sözlərinə görə, vəziyyət həm sanitar, həm də ekoloji baxımdan təhlükəli hal alıb.
