Gəncə şəhərində sahibsiz itlər problemi redaksiyamız tərəfindən dəfələrlə gündəmdə saxlanılan əsas məsələlərdən biri olaraq qalır. Son aylarda şəhər ərazisində it dişləməsi halları artıb. Rəsmi qurumlar tərəfindən yüzlərlə belə hadisənin qeydə alındığı bildirilir.
Gencexeber.az-a müraciət edən vətəndaşların sözlərinə görə, problem yalnız küçə heyvanlarının nəzarətsiz qalması ilə məhdudlaşmır. İddia olunur ki, bir çox hallarda heyvanların aqressiv davranışının kökündə onlara qarşı göstərilən münasibət dayanır.
Redaksiyamıza təqdim edilən materiallarda qeyd olunur ki, bəzi şəxslər, xüsusilə yeniyetmələr, küçə itlərinə qarşı aqressiv davranışlar sərgiləyirlər. Bu kimi hallar heyvanlarda qorxu və aqressiyanın formalaşmasına səbəb olur.
Belə faktlardan biri Gəncə Yaşayış Kompleksinin yaxınlığında qeydə alınıb. Görüntülərdə yeniyetmələrin itlərə daş atdığı, onları qəzəbləndirdiyi və stress vəziyyətinə saldığı əks olunub. Bu isə öz növbəsində təhlükəli vəziyyət yaradır.
Mütəxəssislər bildirirlər ki, heyvanlara qarşı aqressiya sonradan onların insanlara hücum etməsi ilə nəticələnə bilər. Bu baxımdan, cəmiyyətdə düzgün davranış qaydalarının formalaşdırılması vacib hesab olunur.
Baytar mütəxəssislərinin sözlərinə görə, uşaqların erkən yaşlardan maarifləndirilməsi mühüm əhəmiyyət daşıyır. Onlar vurğulayırlar ki, sahibsiz heyvanlara qarşı zorakılıq hallarının qarşısı alınmalı, insanlarda bu mövzuda düzgün yanaşma formalaşdırılmalıdır.
