Gəncədə Silahlı Qüvvələr Günü ərəfəsində əsgərlərə dəstək və təşəkkür mesajları ünvanlanıb, bayram münasibətilə tədbir təşkil olunub.
Gencexeber.az-ın məlumatına görə, 24 iyun 2025-ci il tarixində Gəncə Qarnizonu İdeoloji və Mədəniyyət Mərkəzinin təşəbbüsü ilə Fikrət Əmirov adına Gəncə Dövlət Filarmoniyasının qarşısında “Əsgərə məktub” adlı layihə keçirilib. Aksiya 26 İyun – Silahlı Qüvvələr Günü münasibətilə təşkil olunub.
Tədbirdə Gəncə Şəhər İcra Hakimiyyətinin başçısı Niyazi Bayramov, Türkiyənin Gəncədəki Baş konsulu Recep Öztop, Gürcüstanın Baş konsulu Kaxaber Abdaladze, YAP Gəncə şəhər təşkilatının sədri Bayram Aslanov, GDU-nun rektoru Yusif Yusibov, ADAU-nun rektoru Zəfər Qurbanov, şəhid anaları, müharibə iştirakçıları, bələdiyyə və ictimai birlik nümayəndələri, eləcə də şəhər sakinləri iştirak ediblər. Onlar əsgərlərə ürək sözlərini yazaraq məktublar ünvanlayıblar.
