Gəncədə fərdi yaşayış evi illərdir zibilliyə çevrilib.
Gencexeber.az-a daxil olan şikayətə əsasən, Məhsəti Gəncəvi qəsəbəsi, 5-ci küçədə yerləşən evdə yaşayan yaşlı cütlük uzun illərdir ki, həyət evinə zibil toplayır. Şikayətçi qonşular iddia edirlər ki, hər iki şəxs təqaüdçüdür və onların bu davranışı nə qonşular, nə də ictimaiyyət üçün anlaşılan deyil.
Nəticədə ətraf evlərə siçanlar və digər gəmiricilər, eləcə də həşəratlar yayılıb. Sakinlərin sözlərinə görə, artıq bu evin yaxınlığında yaşamaq çətinləşib, küçəni isə üfunət bürüyüb.
Qonşular Gəncə şəhər Gigiyena və Epidemiologiya Mərkəzinə, yerli polis orqanlarına və hətta Fövqəladə Hallar Nazirliyinə dəfələrlə şikayət etsələr də, nəticə olmayıb.
Redaksiyamız məsələ ilə bağlı həmin evin hüquqi sahibləri ilə əlaqə saxlayıb. Onlar tərəfindən iddia edilib ki, sözügedən cütlük 10 il öncə onların bir müddətlik boş qalan evini zəbt edib.
Razılığa gələ bilmədiklərindən evin sahibləri cütlüyü məhkəməyə veriblər. Uzun sürət çəkişmələrdən sonra ötən ilin sonunda məhkəmə tərəfindən evin boşaldılmasına dair qətnamə qəbul edilib. Lakin qərarı icra edən aidiyyəti qurumun əməkdaşının səylərinə baxmayaraq tikilinin boşaldılmasına hələ də nail olmaq mümkün olmayıb.
Hazırda şikayətçilər aidiyyəti dövlət qurumlarından operativ və təsirli müdaxilə gözləyir. Onların tələbi aydındır: bu cür halların qarşısı alınmalı və küçənin sanitar vəziyyəti bərpa edilməlidir.
