Gəncə şəhəri 3-cü mikrorayonun 1, 2, 3, 4 və 5-ci binalarında yaşayan sakinlər ərazidəki elektrik dirəklərinin qəzalı vəziyyətdə olmasından narazıdır.
Gencexeber.az-a daxil olan şikayətlərə əsasən, hazırda ərazidə abadlıq işləri aparılır və məhəllənin yenilənməsi istiqamətində işlər görülür. Lakin elektrik dirəklərinin yenilənməsi ilə bağlı hələlik hər hansı tədbir görülməyib.
Sakinlər bildirirlər ki, son günlərdə şəhər rəhbərliyi səviyyəsində ərazidə aparılan işlərlə tanışlıq zamanı elektrik dirəklərinin yeniləri ilə əvəzlənməsi ilə bağlı göstəriş də verilib. Lakin, vətəndaşların sözlərinə görə, hələ heç bir iş görülməyib.
Ərazidə bir neçə elektrik naqilinin çinar ağaclarına bağlandığı, bəzi dirəklərin isə tamamilə əyildiyi bildirilir. Vətəndaşlar vəziyyətin təhlükə yaratdığını vurğulayaraq, problemin təxirəsalınmaz şəkildə həll olunmasını istəyirlər.
Onlar həmçinin qeyd edirlər ki, abadlıq və asfalt işləri başa çatdıqdan sonra elektrik dirəklərinin dəyişdirilməsi əlavə çətinliklər yarada bilər. Buna görə də dirəklərin yenilənməsi işlərinin abadlıq işləri tamamlanmadan həyata keçirilməsini xahiş edirlər.
