Ombudsmanın bərabərlik hüququnun təmini və ayrı-seçkiliyin qarşısının alınması üzrə müstəqil monitorinq mexanizmi çərçivəsində Gəncə şəhərində də baxış keçirilib.
Gencexeber.az məlumat verir ki, Ombudsman Aparatının yaydığı məlumata görə, monitorinq zamanı əməkdaşlar Gəncə, Mingəçevir və Göygöl də daxil olmaqla bir sıra bölgələrdə digər millətlərə və dinlərə mənsub şəxslərə aid qəbiristanlıqlara və memorial obyektlərə baxış keçiriblər.
Bildirilir ki, "Şəhərsalma və Memarlıq İli" çərçivəsində həyata keçirilən monitorinqin məqsədi müxtəlif dövrlərdə salınmış qəbiristanlıqların mövcud vəziyyətinin qanunvericiliyin və beynəlxalq öhdəliklərin tələblərinə uyğunluğunu qiymətləndirmək, həmçinin onların mühafizəsi və istifadəsində bərabərlik prinsipinə riayət olunub-olunmamasını araşdırmaq olub.
Aparılan baxışlar zamanı qəbiristanlıqların ərazisində qanunsuz tikinti və ya təyinatdan kənar istifadə halları aşkar edilməyib. Bu isə tarix və mədəniyyət abidələrinin qorunması ilə bağlı tələblərə ümumilikdə əməl olunduğunu göstərir.
