Gəncədə qaçqın və məcburi köçkünlər üçün salınmış qəsəbədə bəzi çoxmənzilli binaların zirzəmiləri və həyətləri ev quşlarının saxlanıldığı hinlərə çevrilib.
Məsələ ilə bağlı Gencexeber.az-a müraciət edən sakinlər bildiriblər ki, Gəncə Beynəlxalq Avtovağzal Kompleksinin yaxınlığında inşa edilmiş şəhərcikdə yerləşən 8, 14, 21, 22 və 24-cü binaların zirzəmilərində və həyətlərində toyuq-cücə saxlanılır.
Vətəndaşların sözlərinə görə, quşların səsi və ətrafa yayılan üfunət səbəbindən pəncərələri açmaq mümkün deyil. Onlar ərazidə antisanitar vəziyyət yarandığını, xüsusilə isti havalarda kəskin qoxular səbəbindən həyətə çıxmağın və ərazidə oturmağın çətinləşdiyini deyirlər.
Şikayətçilərin sözlərinə görə, çoxmənzilli binaların yerləşdiyi ərazilər tədricən "toyuq ferması"nı xatırlatmağa başlayıb. Habelə qonşuluq münasibətləri səbəbi ilə bəzi vətəndaşlar narazılıqlarını açıq şəkildə ifadə etməkdən çəkinirlər. Lakin son vaxtlar vəziyyətin daha da çətinləşdiyi, həyətyanı və zirzəmi sahələrində toyuqla yanaşı qaz və ördək də saxlanıldığı qeyd olunur.
Sakinlər aidiyyəti qurumları məsələyə müdaxilə etməyə, ərazidə sanitar vəziyyətin yaxşılaşdırılması və çoxmənzilli binaların zirzəmi və həyətlərində ev quşlarının saxlanılmasının qarşısının alınması üçün müvafiq tədbirlər görməyə çağırırlar.
