Gəncədə "BakuBus" MMC-yə məxsus 11 nömrəli marşrut xətti ilə hərəkət edən avtobusda insident baş verib.
Gencexeber.az-a ünvanlanan şikayətlərə görə, hadisə bu gün Nizami Gəncəvi prospektində, Mərkəzi Univermağın qarşısında yerləşən dayanacaqda qeydə alınıb.
Hadisə şahidlərinin sözlərinə görə, avtobusda olan azyaşlı uşaqlardan biri nəqliyyat vasitəsi sürətlənən zaman yıxılmamaq üçün validatorun yanında yerləşən texniki xidmət qutusunun qapağından tutub. Bu zaman sözügedən kiçik qapaq yerindən çıxıb.
İddia edilib ki, sürücü avtobusu yolun kənarında saxlayaraq qapağın fotosunu çəkib və dispetçerə göndərərək vəziyyət barədə məlumat verib. Bu proses sərnişinlər avtobusda olduğu müddətdə baş verdiyindən onlar uzun müddət nəqliyyat vasitəsinin salonunda gözləməli olublar.
Şahidlərin sözlərinə görə, sərnişinlər arasında olan bir qadın qapağı yerinə taxaraq sürücüyə problem olmadığını bildirib. Lakin buna baxmayaraq, sürücü hərəkəti davam etdirməkdən imtina edib.
Daha sonra yaşlı sərnişinlərdən biri sürücüyə iradını bildirib. O, qapağın qırılmadığını, sadəcə yerindən çıxdığını və yenidən taxıldığını deyib. Bundan sonra tərəflər arasında mübahisə yaranıb.
İddialara görə, təxminən 20 dəqiqə sonra sürücü qrafik üzrə hərəkət edən digər 11 nömrəli avtobusa sərnişinlərin keçməsini tələb edib. Bu zaman sürücü ilə yaşlı kişi arasında yenidən gərginlik alovlanıb.
İddia edilir ki, sürücü kişidən kobud şəkildə avtobusu tərk etməsini tələb edib və yumruq zərbələri ilə hədələyib. İnsident digər sürücünün müdaxiləsi nəticəsində böyüməyib.
