Dünən, saat 14:00 radələrində Gəncədə "BakuBus" MMC-nin istismarına verilmiş 11 nömrəli marşrut xəttinin "77-JZ-389" dövlət nömrə nişanlı marşrut avtobusunda təhlükəli hadisə baş verib.
Gencexeber.az-ın məlumatına görə, iddia olunur ki, 16 yaşlı yeniyetmə dayanacaqda avtobusa minmək istəyərkən ayağını avtobusun girişinə qoyduqda, qapı bağlanıb və nəqliyyat vasitəsi qəflətən sürətlənməyə başlayıb.
Hadisə nəticəsində yeniyetmə ciddi xəsarət almayıb, yalnız ayağı sıyrılıb. Lakin onun bildirdiyinə görə, bu hal daha ağır fəsadlara səbəb ola bilərdi:
"Cəld ayağımı çəkdim. Amma yaşlılar, əlillər üçün Allah uzaq eləsin, daha pis nəticə ola bilərdi."
Sakinlərin sözlərinə görə, Gəncəyə yeni avtobus marşrutları ayırması şəhər əhalisinə böyük kömək olub. Lakin bəzi sürücülərin məsuliyyətsiz davranışı ictimai nəqliyyatın əsas prinsipi olan təhlükəsizliyi kobud şəkildə pozur.
Şəhər sakinləri bu kimi halların bir daha təkrarlanmaması üçün aidiyyəti qurumlardan sürücülərə ciddi nəzarət edilməsini tələb edirlər.
