Gəncədə avtomobil təmiri sexlərindən və ehtiyat hissələri dükanlarından silsilə oğurluq edən şəxs müşahidə kameralarına tuş gəlib.
Gencexeber.az-a videogörüntünü təqdim edən müəssisənin əməkdaşı iddia edib ki, hadisə şəhər ərazisində yerləşən yük avtomobillərinin təkər təmiri məntəqəsində baş verib. Onun sözlərinə görə, disk və müxtəlif ehtiyat hissələri oğurlanıb.
“Qapını kəsməyə çalışıb, amma cəhdləri nəticəsiz qalıb. Daha sonra darvazanı aşaraq əraziyə daxil olub. Kameralardan birinin istiqamətini dəyişib. Bizdən əvvəl də bir neçə sexə girib, əşyaları aparıb”, – deyə zərərçəkmiş bildirib.
Əlavə edilib ki, bu ilk hadisə deyil. Eyni şəxs digər yaxınlıqdakı sexlərə də daxil olaraq oğurluqlar edib. Hadisələrin əsasən gecə saat 04:00-dan 06:00-a kimi baş verdiyi qeyd olunur.
Məsələ ilə bağlı Gəncə şəhər Kəpəz Rayon Polis İdarəsinə və Daxili İşlər Nazirliyinin “102” qaynar xəttinə məlumat verilib. Hazırda hüquq-mühafizə orqanları tərəfindən əməliyyat-axtarış tədbirləri həyata keçirilir.
