2026-cı ilin yanvar-mart aylarında Gəncə şəhərində kənd təsərrüfatı sahəsində müsbət dinamika müşahidə olunub.
Gencexeber.az-a Gəncə Şəhər Statistika İdarəsindən verilən məlumata əsasən, 2026-cı ilin aprel ayının 1-nə kimi şəhər üzrə 63,6 hektar sahədə yazlıq bitkilər əkilib. Əkin sahələrinin 5,4 hektarını dənli və dənli paxlalı bitkilər, 31,2 hektarını tərəvəz, 27 hektarını isə çoxillik otlar təşkil edib. Yazlıq bitkilərin əkin sahəsi ötən ilin müvafiq dövrü ilə müqayisədə 86 faiz artıb.
Məlumata görə, cari ilin aprelin 1-i vəziyyətinə təsərrüfatlarda 664 baş iribuynuzlu mal-qara, o cümlədən 272 baş inək və camış, həmçinin 1249 baş qoyun və keçi mövcud olub.
Hesabat dövründə heyvandarlıq məhsullarının istehsalında da artım qeydə alınıb. Belə ki, yanvar-mart aylarında 18 ton diri çəkidə ət, 166 ton süd və 274 min ədəd yumurta istehsal edilib. Süd istehsalı ötən ilin eyni dövrü ilə müqayisədə 1 ton və ya 0,6 faiz artıb.
Ümumilikdə, 2026-cı ilin ilk üç ayında Gəncədə kənd təsərrüfatının ümumi məhsulu faktiki qiymətlərlə 693,5 min manat təşkil edib və bu göstərici əsasən heyvandarlıq məhsullarının payına düşüb.
