Gəncə şəhər Nizami Aydın adına 18 nömrəli tam orta məktəbin keçmiş direktoru Mətanət Rzayeva Məktəbəqədər və Ümumi Təhsil üzrə Dövlət Agentliyini məhkəməyə verib.
Sabiq direktor Nərimanov Rayon Məhkəməsinə müraciət edib.
İddiaçı cavabdehə qarşı əmrin ləğv edilməsi, işə bərpa və məcburi iş buraxmaya görə əmək haqqının ödənilməsi tələbi irəli sürüb.
Məlumata görə, Mətanət Rzayeva 2006-cı ildən 2025-ci ilədək Gəncə şəhər Nizami Aydın adına 18 nömrəli tam orta ümumtəhsil məktəbinin direktoru vəzifəsində çalışıb.
İş materiallarına əsasən, məktəbdə aparılan monitorinqlər zamanı təlim-tərbiyə prosesi, sənədləşmə, şagird və müəllimlərin davamiyyəti, eləcə də kadr idarəçiliyinin təşkili ilə bağlı bir sıra nöqsanlar müəyyən edilib. Aşkar edilmiş nöqsanlarla əlaqədar 2025-ci ildə müvafiq əmrlə ona sonuncu xəbərdarlıqla şiddətli töhmət verilib.
Bundan sonra Gəncə-Daşkəsən Regional Təhsil İdarəsinin əmrinə əsasən həmin məktəbdə təkrar monitorinq keçirilib. Monitorinqin nəticələrinə görə sabiq direktorun əmək müqaviləsinə xitam verilib.
M.Rzayeva isə işdən çıxarılmasını qanunsuz və əsassız hesab edib.
Onun iddiasına görə, təhsil idarəsinin rəhbərliyi onu idarəyə dəvət edərək könüllü ərizə yazıb işdən çıxmasını təklif edib, əks halda məktəbdə monitorinq aparılacağını və işdən azad ediləcəyini bildiriblər.
Mətanət Rzayeva bu məsələ ilə bağlı dəfələrlə kassasiya şikayəti versə də, təmin edilməyib.
Bununla da məktəb direktorunun işə bərpa olunması, məcburi iş buraxma müddəti üçün əməkhaqqının və digər xərclərin ödənilməsi barədə tələbləri təmin edilməyib.
Mənbə:plat.аz
