Gəncə şəhər Mənzil Kommunal Təsərrüfatı İstehsalat Birliyinin (MKTİB) canlı qüvvəsi tərəfindən Gəncəçayda növbəti təmizlik aksiyası keçirilib.
Gencexeber.az bildirir ki, aksiyaya MKTİB-nin Ərazi Xidmət Sahələrinin əməkdaşları cəlb olunub. Təmizlik işləri çayın əsasən mərkəzi hissəsində, körpülərin ətrafında və çayın sağ və sol sahilində həyata keçirilib.
Təmizlik aksiyası zamanı çayın məcrasından məişət tullantıları, ağac qırıntıları, kol-kos, alaq otları və məişət tullantıları bir yerə yığılaraq ərazidən daşınması təmin edilib. Mövcud zibil konteynerləri boşaldılıb, ətrafında səliqə-sahman yaradılıb.
MKTİB növbəti dəfə şəhər əhalisindən və xüsusən də çay kənarı obyekt sahiblərindən xahiş edir ki, məişət və digər tullantılarını çayın ərazisinə atmasınlar, bunun üçün təyin olunmuş konteynerlər Gəncəçay boyu yerləşdirilib.
