Gəncədə 80-dən çox ailənin yaşadığı yataqxana son dərəcə qeyri-qənaətbəxş vəziyyətdədir.
Gencexeber.az-a sakinlər tərəfindən daxil olan məlumata görə, bina hələ SSSR-i dövründə keçmiş toxuculuq fabrikinin işçilərinə verilib. O vaxtdan bəri, demək olar ki, heç bir əsaslı təmir işi aparılmayıb. Bu gün üç girişli üçmərtəbəli bina yaşayış üçün minimum standartlara belə cavab vermir.
Sakinlərin sözlərinə görə, yataqxanada ümumiyyətlə hamam otaqları yoxdur, nə mənzillərdə, nədə ki, mərtəbələrdə. İnsanların yuyunmağa məcbur olduğu çirkli tualetlər isə sanitar normalara cavab vermir. Çirkab suları müntəzəm olaraq birbaşa həyətə axıdılır, sakinlərin sağlamlığı üçün təhlükə yaradır.
Mənzillərin əksəriyyəti bir otaqlıdır, bu da ailələrin, xüsusən də uşaqlıların rahat yaşamasını qeyri-mümkün edir. Qaz təchizatının olmaması və qeyri-sabit su təchizatı vəziyyəti daha da ağırlaşdırır.
Yerli sakinlər ümid edirlər ki, aidiyyəti qurumlar onların yaşayış şəraitinə diqqət yetirəcək və vəziyyətin yaxşılaşdırılması üçün tədbirlər görəcəklər.
