Gəncə Şəhər Baş Polis İdarəsi tərəfindən gəncəli Xalq artistinin kart hesabından vəsaitin qanunsuz yolla mənimsənilməsi faktı ilə bağlı araşdırma aparılır.
Gencexeber.az məlumat verir ki, Gəncə Dövlət Filarmoniyasının Kamera Orkestrinin solisti Sevinc İbrahimova dələduzluğun qurbanı olub. Onun sözlərinə görə, iyunun 15-də, saat 16:00 radələrində Gürcüstan nömrəsindən ona zəng edilib. Özünü "Azercell" əməkdaşı kimi təqdim edən şəxs Sevinc xanıma bildirib ki, 10 qəpik ödəniş etməklə mobil nömrəsinin bağlanmasının qarşısı alınacaq.
Kart məlumatları ilə onlarla bölüşən sənətkar qeyd edib ki, bir müddət sonra bu dəfə özünü "Kapital Bank"ın Təhlükəsizlik Xidmətinin əməkdaşı kimi təqdim edən şəxs kartına kiberhücumun həyata keçirildiyini və dələduzluğun qarşısının tam alınması üçün şəxsiyyət vəsiqəsindəki məlumatların onunla bölüşməyi istəyib. Bu məlumatlar da əldə edildikdən sonra hesabdan 1100 manat oğurlanıb.
Tanınmış sənətkarın məsələ ilə bağlı Daxili İşlər Nazirliyinə müraciətdən sonra dərhal araşdırmalara başlanılıb. Sevinc İbrahimova öz növbəsində buna görə daxili işlər naziri Vilayət Eyvazova və Gəncə Şəhər Baş Polis İdarəsinin rəisi Teymur Hacıyevə dərin təşəkkürünü bildiririb.
