Gəncə İdman Liseyində uşu üzrə uşaq, yeniyetmə və gənclər arasında açıq “Qərb kuboku” yarışı baş tutub.
Gencexeber.az-ın məlumatına görə, Gəncə-Daşkəsən Regional Gənclər və İdman İdarəsi, Azərbaycan Çin Döyüş Növləri Assosiasiyası (AÇDNA) və Azərbaycan Uşu Federasiyası (AUF) Qərb filialının birgə təşkilatçılığı ilə keçirilən yarış 3 qat dünya, 15 qat Azərbaycan çempionu Elnur İlqar oğlu Alıyevin xatirəsinə həsr olunub.
Turnirdə ümumilikdə 250-yə yaxın idmançı, 30 komanda 60 çəki dərəcəsində mübarizə aparıb. Gəncə komandası 15 nəfərlə təmsil olunub.
Yarışın yekununda komanda hesabı üzrə Gəncə birinci, Bakı ikinci, Göyçay isə üçüncü yeri tutub. Qaliblərə diplom, medal və kuboklar təqdim edilib.
