Gəncədə piyada səkiləri təmir edilir.
Gencexeber.az-ın məlumatına görə, Gəncə dəmiryol vağzalı yaxınlığında, Zülfü Hacıyev küçəsində piyadaların təhlükəsiz hərəkəti üçün nəzərdə tutulan səkilərdə abadlıq işlərinə başlanılıb.
Qeyd edək ki, sözügedən ərazidə səkilər avtomobil yolundan yeni bordürlərlə ayrılsa da, uzun müddət qum, toz-torpaq və daşlarla örtülü vəziyyətdə qaldığından piyadalar üçün istifadəsi çətin idi. Bu hal sakinlərin haqlı narazılığına səbəb olurdu.
Hazırda piyada səkisinin asfaltlanması işləri həyata keçirilir. Gəncə Şəhər İcra Hakimiyyəti tərəfindən icra edilən asfaltlama prosesi Gəncə dəmiryol vağzalınadək olan hissəni əhatə edəcək.
