Gəncə Regional Turizm İdarəsinin təşəbbüsü, tanınmış dağçı Mahir Hüseynovun dəstəyi və təşkilatçılığı ilə Gəncə Dağçılıq Klubu yaradılıb.
Gencexeber.az məlumat verir ki, qərb regionunda dağ turizminin inkişafının dəstəklənməsi məqsədilə Kiçik Qafqaz dağ marşrutu hazırlanıb, Şəhriyar–Topalhəsənli kənd klasterində yerləşən Zurnabad qalası turizm marşrutu üzrə infrastruktur qurulub. Belə ki, marşrut boyunca 2 ədəd söhbətgah, 1 ədəd məlumat lövhəsi və 9 ədəd istiqamətləndirici turizm nişanı quraşdırılıb. Eyni zamanda, Cavadxan Zirvəsi marşrutu, eləcə də müxtəlif hikinq və trekkinq marşrutlarının formalaşdırılması istiqamətində işlər davam etdirilir.
Bununla yanaşı, regionun dağ turizmi potensialından daha səmərəli istifadə olunması və bu sahənin inkişaf etdirilməsi məqsədilə Qərb Regionu üzrə Dağ Turizmi Konsepsiyası hazırlanır.
