Gəncədə təhsil alan tələbə qrup yoldaşı tərəfindən aldadılıb. Bu haqda 19 oktyabr tarixində Qafqazinfo-ya istinadən məlumat veririk.
Gəncə Dövlət Universitetinin Tarix fakültəsinin qiyabiçi tələbəsi Musa Məmmədov (ad-soyad şərtidir) 44 yaşlı qrup yoldaşı Nəsimi Zeynalov tərəfindən aldadılıb. Zeynalov Musaya yüksək vəzifədə çalışan qohumunun olduğunu bildirib. O, 8 min manat müqabilində Musanı vakant vəzifəyə təyin etdirəcəyinə söz verib və pulu alıb. Bir müddət sonra Nəsiminin dələduzluq etməsi üzə çıxıb.
Musanın şikayəti ilə Gəncə Şəhər Baş Polis İdarəsində cinayət işi açılıb. Daha sonra baxılması üçün Gəncə Şəhər Məhkəməsinə göndərilib.
Burada Nəsimi Musadan aldığı pulların hamısını artıq qaytardığını və barışdıqlarını bildirib. Məhkəmənin hökmü ilə Zeynalov 1 il azadlığın məhdudlaşdırılması cəzası alıb. Təqsirkarın üstünə elektron nəzarət cihazı yerləşdirilib və üzərinə bir sıra inzibati vəzifələr qoyulub.
Qeyd edək ki, Musa Məmmədov Sumqayıtda yerləşən musiqi məktəbində müəllim işləyirdi. O, həmin təhsil müəssisəsinin direktoru olmaq istəyib.
