Gəncə şəhərinin Xanlar küçəsində bir neçə ağac baxımsızlıq səbəbindən quruyub.
Gencexeber.az-a bu barədə küçə sakinləri tərəfindən şikayət daxil olub.
Həmin şəxslər bildirir ki, küçədə həm qurumaqda olan, həm də quruyan ağaclar var:
“Ağaclara qulluq edilmədi, nəticədə də ağaclar qurudu. Buna görə, ərazinin görünüşü korlanıb. Həm də təhlükəli hal yaranır. Xüsusilə, bəzi ağacların budaqları yola doğru əyilib və sürücülər üçün maneə törədir.
Dəfələrlə müvafiq qurumlara müraciət etməyimizə baxmayaraq, hələ də heç bir tədbir görülmür. Vəziyyət daha da pisləşmədən, hansısa bədbəxt hadisə baş vermədən qurumuş ağacların kəsilməsini və ərazinin təhlükəsiz hala gətirilməsini istəyirik”.
