Gəncə şəhər 37 nömrəli tam orta məktəb aylardır təmir edilmir.
Gencexeber.az-a bununla bağlı şikayət daxil olub. Sözügedən təhsil ocağının qarşısında toplaşan qadınlar iddia edirlər ki, uşaqları sentyabrın 15-i yeni tədris ilinə uyğun olaraq dərslərə cəlb olunsalar da, cəmi iki həftə sonra yararsız vəziyyətdə olmayan məktəbin binası təmirə dayanıb.
Bildirilib ki, Gəncə-Daşkəsən Regional Təhsil İdarəsindən onlara verilən vədlərə əsasən, tikilinin ətrafında aparılan yenidənqurma işlərinə mart ayında yekun vurulmalıdır. Lakin, təqdim etdiyimiz kadrlardan da bəlli olur ki, binada söküntü işlərindən savayı heç bir təmir işi görülməyib.
Şikayətçilərin sözlərinə görə, övladları yaxınlıqda olan 26 nömrəli məktəb-lisey kompleksinə deyil, aralıda yerləşən 3 və 40 nömrəli tam orta məktəblər arasında bölüşdürülüblər. Bu isə yol pulu xərclərini əhəmiyyətli dərəcədə artırıb.
Valideynlər məsələnin aidiyyəti üzrə tez bir zamanda həllini tələb edirlər.
Qeyd edək ki, redaksiyamız tərəfindən məsələnin araşdırılması üçün Gəncə-Daşkəsən Regional Təhsil İdarəsinə sorğu ünvanlanıb.
