Gəncədə yeni layihə təqdim olunub. Bu haqda 23 aprel tarixində Gəncə Dövlət Filarmoniyasına istinadən məlumat veririk.
Şəhərimizdə ilk dəfə "Üzbəüz" layihəsi baş tutub. Tədbir Gəncə Dövlət Filarmoniyasında təşkil olunub. Proqramın məqsədi mədəniyyətin müxtəlif sahələrində çalışan tanınmış şəxsiyyətlərlə görüşlərin təşkil olunmasıdır. Burada qonaq olan şəxslər öz təcrübələrini, uğurlarını bölüşəcəklər.
"Üzbəüz" layihəsinin ilk iştirakçısı Azərbaycan Yazıçılar Birliyinin Hərbi Vətənpərvərlik Komissiyasının sədri, "Qızıl Qələm" mükafatı laureatı Şahin Musaoğlu olub. Görüşdə qonaq ona ünvanlanan sualları cavablandıraraq gənclərlə fikir mübadiləsi aparıb.
Tədbirdə Şahin Musaoğlunun müəllifi olduğu "Cənab leytenant", "İgid əsgər, möhkəm dayan", "Əsgər, Vətən əmanəti", "Ağ ümid" və digər mahnılar Filarmoniyanın solistləri Rüstəm Cəfərov, Əli Məmmədov, Vasif Bayramov tərəfindən səsləndirilib.
Qeyd edək ki, sözügedən layihə ayda bir dəfə keçiriləcək.
