Gəncə Dövlət Filarmoniyasının 90 illiyinə həsr olunmuş Fikrət Əmirov I Ümumrespublika Musiqi Festivalının təntənəli bağlanış mərasimi Müslüm Maqomayev adına Azərbaycan Dövlət Akademik Filarmoniyasında baş tutub.
Gencexeber.az bildirir ki, gecəni giriş sözü ilə açan Azərbaycanın mədəniyyət nazirinin müavini, Xalq artisti Murad Hüseynov festivalın əhəmiyyətindən bəhs edib.
O, Gəncə Dövlət Filarmoniyasının 90 illik yubileyi münasibətilə musiqi ictimaiyyətini təbrik edib.
Bağlanış mərasimində Azərbaycan Dövlət Akademik Opera və Balet Teatrının Simfonik Orkestrinin müşayiəti, Əməkdar artist Əyyub Quliyevin dirijorluğu ilə Xalq artistləri Gülnaz İsmayılova, Şahnaz Haşımova, Sevinc İbrahimova, Əməkdar artistlər Ramil Qasımov, İnarə Babayeva, Aybəniz Haşımova, Ehtiram Hüseynov, Tural Abdullayev, Səidə Tağızadə (fortepiano), Əməkdar mədəniyyət işçisi Mehparə Cəfərova, solist Rüstəm Cəfərov ifalar səsləndiriblər.
Qeyd edək ki, Gəncə Dövlət Filarmoniyasının 90 illiyinə həsr olunmuş Fikrət Əmirov I Ümumrespublika Musiqi Festivalı 4-9 mart tarixlərində ölkəmizdə ilk dəfə keçirilib. Festival çərçivəsində Fikrət Əmirovun həyat və yaradıcılığına həsr olunmuş elmi seminar, bəstəkarın əsərlərindən ibarət konsert proqramları, “Sevil” operası, “Min bir gecə” baleti təqdim olunub.
