8 Mart - Beynəlxalq Qadınlar Günüdür.
Bu gün Klara Setkinin təklifi ilə 1910-cu ildə sosialist qadınların Kopenhagendə keçirilən II Beynəlxalq Konfransında təsis olunub.
Mahiyyət etibarilə qadınların ictimai-siyasi, iqtisadi bərabərlik, öz hüquqları uğrunda mübarizədə həmrəylik günü kimi yaradılıb.
Gencexeber.az-ın əməkdaşı U-23 dünya çempionatının qalibi, güləşçi Elnurə Məmmədova ilə həmsöhbət olub.
Onunla müsahibəni təqdim edirik:
- Elnurə xanım, öncə oxucularımız üçün özünüzü təqdim edərdiniz.
- 2002-ci ildə Tovuz rayonunda anadan olmuşam. U-23 Avropa çempionatında II yer, U-23 dünya çempionatında III yerə layiq görülmüşəm.
- Güləşçi kimi karyeranızı necə başladınız? Həmin dövrü necə xatırlayırsınız?
- Uşaqlıqdan bu sahəyə çox həvəsim olub. Güləş yarışlarını daima izləyirdim. Güləşçi olmağı qarşıma hədəf kimi qoydum. Çoxlu əziyyətlərdən sonra buna nail oldum. İdmanı vaxtı-vaxtında edirdim. Həvəslə gələcəyim üçün çalışırdım.
- İdmançı qadın olmağınız sizin üçün hansı çətinlikləri yaratdı?
- Heç bir çətinliyim olmayıb.
- Qadınlar üçün mübarizənin və gücün simvolu olmaq necə bir hissdir?
- Həqiqətən, çətin bir peşədir. Biz gücümüzlə kişilərdən fərqlənmədiyimizi göstəririk. Qadınlara güc vermək, mübarizənin simvolu olmaq çox gözəl bir hissdir. Ümumiyyətlə, qadın və ya kişi - fərq etmir, insan şəxsiyyət olmalıdır.
- Ailəniz və yaxınlarınız idman karyeranızı necə dəstəkləyirlər?
- İlk gündən ailəm və yaxınlarım mənə dəstək olub. Hər çətinliyimdə onları yanımda görmüşəm. Hər addımımda arxamda olduqlarını bilirəm.
- İdmanla yanaşı, şəxsi həyatınızı necə idarə edirsiniz? Həm idmançı, həm də qadın olaraq balansı necə qoruyursunuz?
- Nə yalan deyim, məşqlərdən ailəmə, şəxsi həyatıma, əyləncəmə vaxt ayıra bilmirəm. Amma bu mənim üçün heç bir problem yaratmır. Çünki idmanı, peşəmi sevirəm. İdman etdikcə güc qazanıram, irəli getmək üçün daha da ruhlanıram.
Lakin vaxt tapdıqca ailəmlə rayonlara səyahət edirəm. Çünki bu mənə ən böyük istirahətdir.
- 8 Mart qadınların mübarizəsi və qələbələrini qeyd etdiyimiz bir gündür. Həm idmançı, həm də qadın olaraq bu günün sizin üçün xüsusi mənası nədir? Qadınlara nə deyərdiniz?
- 8 Martda qadınlara hədiyyə verildiyi üçün bu bayramı çox sevirəm. Çünki hər bir qadın hədiyyə almağı çox xoşlayır. Qadınlara ən böyük mesajım - şəxsiyyət olmaq üçün əllərindən gələni etsinlər. Çünki qadın və ya kişi - hər birimiz insanıq.
Fidan İlqar
